ILOILO CITY–Naghilibi-on ang live in partner ni dismissed SPO4 Nerio “Ricky” Salcedo matapos makit-an ang kahimtangan sang pulis nga wala na sang kabuhi samtang ginapaguwa sa ila balay.
Ini matapos ginapahayag nagbato si Salcedo sang ginserbe sang search warrant sa iya nga balay may kaangatanan sa illegal possession of firearms.
Sa interview sang Bombo Radyo kay alyas Babe, 16 anyos kag live in partner ni Salcedo, iya ginpahayag nga nagatulog sila sang iya live-in sang ginsulod sang mga pulis ang ila nga balay.
Suno kay Babe, nagpangabay pa si Salcedo sa mga pulis nga indi pagdalahigon ang ka live-in partner.
Gilayon naman nga ginpaguwa si Babe sa balay apang nabilin sa sulodsi Salcedo kag ang mga pulis.
Ginkakibot ni Babe sang hinali may naglupok sa sulod sang ila nga balay samtang ginapanindugan niya nga mabuot nga sahi sang tawo ang iya live-in partner.
Nakuha sa balay ni Salcedo ang submachine pistol, caliber .38 revolver kag caliber .22 pistol.
Gindeklarar nga patay si Salcedo matapos nakaangkon sang walo ka igo sa lawas.