ILOILO CITY–Emosyonal si Sara Mayor Ermelita Salcedo samtang ginasaysay ang natabo sang Oktubre 17, kadungan sang pagserbe sang search warrant sa ila balay.
Sa exclusive interview sang Bombo Radyo kay Mayor Salcedo, iya ginpahayag nga nakabugtaw siya alas 4 sa kaagahon agud kuntani nga maggamit sang banyo sang iya natalupangdan sa CCTV monitor nga madamu sang pulis ang yara sa sagwa sang ila balay sa Sara, Iloilo.
Dugang pa ni Mayor Salcedo, ginguba sang mga pulis ang gate kag ang main door sang balay tubtub nga ginsulod ang tagsa ka kwarto.
Bangud nga naga-isahanon lang si Mayor Salcedo sa ground floor, wala na siya nagbato pa sa mga pulis.
Nagsinggitan suno kay Mayor Salcedo ang mga pulis kun sa diin ang iya bana nga si anay Mayor Neptali Salcedo nga wala sa balay sang amo nga tion samtang ang iya mga kabataan kag apo ang nagakatulog sa ikaduha nga panalgan sang balay.
Dugang pa ni Mayor Salcedo, ginbaklid siya kag ginpahapa samatang gina-usisa sang mga pulis ang sulod sang iya balay.
Bangud nga naglain ang iya pamatyag, ginpapungko si Mayor Salcedo apang nakabaklid sa gihapon ang iya kamot.
Gintudlo man niya sa mga pulis ang mga armas luthang nga nakasaad sa search warrant apang ginpahayag sang alkalde nga kumpleto ini sa dukomento.
Masobra pa sa apat ka oras bag-o naka-abot ang mga barangay official sa ila balay agud nga makawitness sa pagpatuman sang search warrant.
Ginpahayag man sang alkalde nga yara sa bukid ang iya bana agud nga asikasuhon ang ila uma.
Pinaka-ulihi niya nga naka-upod ang bana sang Oktubre 16 sang nagfile sang Certificate of Candidacy (COC) ang iya bata nga magakandidato sa pagka alkalde sa Sara.
Ginkwestyon man ni Mayor Salcedo ang pagpatuman sang search warrant bangud nga suno sa iya dapat nga ipakita kag ipaathag sa subject person kun ano ang kaundan sang search warrant.