ILOILO CITY–Napasakaan na sang kaso ang nadakpan nga retired police nga nagapangilkil sa Estancia, Iloilo.
Sa interview sang Bombo Radyo kay Police Chief Inspector Jona Galicha, hepe sang Estancia Municipal Police Station, iya ginpahayag nga ang nadakpan nga retired police amo si SPO1 Francisco Buaron Osal nga ginatudlo tinawo ni dismissed SPO4 Nerio “Ricky” Salcedo sang Sara, Iloilo.
Ginpahayag ni Galicha nga si Osal ang nagapangilkil sa mga pasahero kag driver sang mga depampasahero nga salakyan sa terminal sa banwa sang Estancia.
Ginahimu nga rason ni Osal amo nga ang ginasukot nga kwarta ang para sa mga broker sang terminal.
Gindalahig man sang retired police ang pangalan ni Mayor Rene Cordero nga amo ang nagpahanugot sa iya nga pagpanukot.
Bangud sini, kaso nga robbery extortion kag usurpation of authority ang ginpasaka batok kay Osal.
Ginpahayag sang Hepe nga bailable ukon mahimo nga makapyansa ang retired police.