ILOILO CITY–Tuman ang pagpasalamat sang pamilya Muzones matapos nga ginpasidunggan ang hiligaynon writer nga si Atty. Ramon Muzones bilang National Artist for Literature.
Sa interview sang Bombo Radyo kay Atty. Rex Muzones, kamagulangan nga anak ni Muzones, iya ginpahayag nga tuman ang iya pagpasalamat bangud nga nahatagan sang pagkilala ang hinimu-an sang iya amay.
Sa pagkamatuod suno kay Atty. Muzones, tuig 1948 pa sang nag-umpisa sa pagsulat sang nobela ang iya amay.
Nangin founder man siya sang SUMAKWELAN nga grupo sang Ilonggo Writers.
Bag-o pa man nahatagan sang National Artist Awards, madamu naman sang nabaton nga local awards ang iya amay.
Bangud nga nakasulat sa pulong nga Hiligaynon ang tanan nga obra ni Muzones, si Dr. Ma. Cecilia Locsin Nava, retired Literature professor sang University of St. La Salle-Bacolod ang nagbalhin sini sa pulong nga english kag tagalog agud nga mapasakop sa pagpili sa mga National Artist sa pungsod.
Tuman ka istrikto suno kay Atty. Muzones ang pagsulundan sa pagpili sa pagahatagan sang nasambit nga pasidungog ilabi pa nga ginhatagan na subong sang kahigayunan ang mga local artist nga makilala.
Samtang, dapat nga isaulog sang bug-os nga Western Viayas ang kadalag-an sang Hiligaynon Writer nga si Atty. Ramon Muzones nga ginkilala bilang National Artist for Literature.
Sa interview sang Bombo Radyo kay Dr. Ma. Cecilia Locsin Nava, retired Literature professor sang University of St. La Salle-Bacolod, iya ginpahayag nga indi lamang kadalag-an sang mga Ilonggo kundi lakip na sa bug-os nga rehiyon ang pagkilala nga ginhatag kay Muzones.
Ini bangud nga si Muzones ang labing una nga Hiligaynon writer nga ginpasidunggan kag ginkilala bilang National Artist.
Agud nga makilala man sa bug-os nga pungsod, mismo si Dr. Nava ang nag-translate sa pulong nga English kag Tagalog sa mga obra ni Muzones.
Ang best seller diri suno kay Dr. Nava amo ang “Margosatubig” nga isa ka West Visayas Fiction tuhoy sa isa ka baganihan nga si Salagunting.
Nagpamalibad si Dr. Nava nga ipatpat kun ano ang proseso sa pagpili sang pagahatagan sang National Artist Award apang suno sa iya, tuman ka istrikto ang pagsulundan.
Gintinguhaan gid ni Dr. Nava nga i-translate sa English kag Tagalog ang “Margosatubig” bangud kanugon suno iya nga indi makilala ang maayo nga sinulatan sang hiligaynon writer.