ILOILO CITY–Ginkakibot ni anay Local Water Unitilities Administration (LWUA) Administrator Lorenzo “Larry” Jamora nga ginpasakaan siya sang kaso nga graft sa Sandiganbayan.
Ang kaso nga graft ang may kaangtanan sa ginapahayag maanomaliya nga procurement process sang water supply contract nga ginpirmahan sang Cagayan De Oro water district kag sang pribado nga kompaniya nga ginapanag-iyahan ni Palawan Governor Jose Alvarez.
Sa exclusive interview sang Bombo Radyo kay Jamora, iya ginpahayag nga kasubong nga tungang gab-i ang iya pamatyagan bangud nga wala gid siya sang ihibalo nga may yara siya sang kaso sa Sandiganbayan.
Wala man sang findings ang Commission on Audit (COA) tuhoy sa procurement process 14 ka tuig na ang nakaligad.
Sa madumduman ni Jamora, nagtambong pa siya sa signing of agreement sang CDO water district kag sang pribado nga kompaniya ni Gov. Alvarez.
Makatilingalahan suno kay Jamora kun nga-a wala gid siya ginpadal-an sang notice agud nga makapaathag.
Ginkwestyon man ni Jamora kun nga-a pinili lang nga board of director sang CDO water district ang ginpasakaan sang kaso.
Gin-athag ni Jamora nga wala nagapahilabot ang LWUA sa procurement process sang isa water district.
Sa pagkamatuod suno kay Jamora, ang LWUA ang nagaserbe lang nga oversight committee sa procurement process.
Gintawag sang anay LWUA administrator nga pan-os na ang amo nasambit nga isyu kag subong lang natalupangdan sang Sandiganbayan.
Kun may ginpirmahan man siya nga dukomento sa procurement process suno kay Jamora, dapat nga ginpadal-an siya anay sang notice agud nga makapaathag.