ILOILO CITY–Halos indi makapati kag tuman ang pagpasalamat sa Ginoo kag kalipay ang nabatyagan sang Ilongga topnotcher sang Fisheries Technologist Licensure Examination 2018.
Sa interview sang Bombo Radyo  kay  Liza Mina Lorraine Iwag ang sang University of the Philippines-Visayas (UPV), iya ginpahayag nga wala niya ginalauman nga siya ang mangin topnotcher sa bug-os nga pungsod.
Nangin inspirasyon niya sa pagkuha sang board exam ang madamo nga oportunidad sa trabaho, mas mataas ang sweldo kag ilabi na gid nga mahim-os na anag iya pamilya.
Gindugang pa ni Iwag nga mabudlay ang ila nangin exam kag limitado lang ang tion sa pag-review.
Sang madali na lang ang pasinawan suno sa top notcher, didto na kag mas nagmaukod siya sa pagtuon adlaw-adlaw.
Ginkakibot  kag ginkalipay naman sang iya ginikanan ang nangin resulta sang pasinawan.
Nagpasalamat naman si Iwag nga madamo sa ila nga nagkuha sang pasinawan nagikan sa UPV kag madamo sa ila ang nakapasar.
Panaugyan naman sang board top notcher sa magakuha pa lang sang pasinawan nga magreview gid dapat kag magpangamuyo.
Si Iwag ang nagtapos bilang isa sa mga Cum Laude sang ila nga batch nga nagraduate sang tinalikdan nga Hunyo sini nga tuig.
Sa 1,773 naman ang nagkuha sang exam, 502 lang ang mapalaron nga nakapasar.
Nahibaluan nga kadam-an sa nagkuha sang pasinawan nagikan sa University of the Philippines Visayas, ang nakapasar kag ginkilala man bilang top performing school ang UPV.