ILOILO CITY–Mapalaron nga wala sang may natiphagan nga kindergarten pupils sang Igcocolo Elementary School sa Guimbal, Iloilo matapos ang pagpaty-og sang 4.8 magnitude nga linog .
Sa interview sang Bombo Radyo kay Mary Claire Era, kindegarten school teacher sa nasambit nga buluthuan, iya ginpahayag nga nagapatigayon siya sang klase sang hinali lang nga nagtay-og anag mabaskog nga linog.
Sunu kay Era, nakahatag pa siya sang instruction sa iya mga estudyante nga “cover” ukon  tabunan ang ila mga ulo gamit ang ila mga kamot, apang nagtudo pa gid ang pagtay-og rasun nga nadesisyunan na lang niya nga pagwaon sa classroom ang mga estudyante agud nga mapahilayo sa katalagman.
Dugang pa sang manunudlo, sang nagabulig siya sa mga estudyante nga makaguwa sa classroom,  hinali lang nga nadagdag ang beam sang kisame sang classroom kag nadagdag man sang flouresent lamp kag maswerte nga wala sang may natiphagan kag naigo.
Pahayag dugang ni Era, bangud sa natabo, naghilibion ang mga estudyante bangud sa tuman nga kahadlok.
Nahibaluan nga lakip sa mga naguba sa nagluntad nga linog sa Guimbal ang ginlakipan sang Guimbal District Hospital, mga karsada kag Cabasi Elementary School.