ILOILO CITY–Maga-umpisa sa pagpatigayun sang COMELEC checkpoint ang Police Regional Office (PRO) 6  sa maabot nga Enero 12.
Ini ang may kaangtanan sa pagpatuman sang COMELEC gunban sa Enero 13 sa pag-umpisa sang election period.
Sa interview sang Bombo Radyo kay P/Supt. Joem Malong, taghambal sang PRO 6, iya ginpahayag nga obligado ang tanan nga unit sang Philippine National Police (PNP) nga magpatigayun sang checkpoint.
Sa Enero 13 sang  aga, may yara sang patigayunon nga unity walk sa bag-o nga grandstand lakip na ang covenant signing kaupod sang mga magakandidato sa eleksyon.
Samtang, may yara man sang suspension sang permit to carry firearms outside residence suno kay Malong bangud sa pagpatuman sang total gunban.
Ang PNP kag ang Philippine Army ang naga-apply sang certificate of authority agud makadala sang armas.
Magluwas sa uniformed personnel, ang mahimo lang maka-apply sang exemption suno kay Malong ang ginalakipan sang  security guards kag mga pulitiko.