ILOILO CITY–Ginpanindugan sang  Iloilo City Health Office nga indi diskriminasyon ang ginaduso sa konseho nga pag-hire sang empleyado nga wala nagapanigarilyo.
Sa interview sang Bombo Radyo kay City Health Officer Dr. Bernard Caspe, iya ginpahayag nga ang nasambit nga lihok ang indi diskriminasyon sa baylo ini ang pabor para sa kadam-an.
Sa pagpaathag ni Dr. Caspe, tuman ka delikado ang epekto sang sigarilyo sa mga smoker ilabi na sa mga non-smoker.
Ini bangud nga ang pagpanigarilyo ang makatuga sang balati-an kasubong sang high blood pressure, diabetes, bronchitis, cancer kag iban pa nga balati-an sa baga.
Indi lamang ang mga smoker ang mahimo iguon sang balati-an kundi lakip man ang mga nagahaklo sang aso.
Sa pihak sini, ginpahayag ni Dr. Caspe nga wala nila ginaduso nga indi na gid pagbatunon ang mga smoker nga aplikante apang kinahanglan sila nga mag paidalom sa cessation clinic antes makatrabaho sa City Government.