Gintinguhaan pa sang anay Punong Barangay kag subong Barangay Kagawad sa Pali Benedicto, Mandurriao, Iloilo City nga makapalagyo sa riding in tandem.
Ang biktima amo si Kagawad Joel Obregon sa diin bag-o lamang siya nakapanaog sa iya nga motorsiklo, ginbalabagan siya gilayon sang duha ka mga suspek.
Ang mga suspek ang nakasakay sa motorsiklo, naka helmet nga itom, nakasuksok sang jacket, maong nga pantalon kag sapatos.
Sa interview sang Bombo Radyo kay Police Lieutenant Colonel Hilarion Roga, pinuno sang Scene of the Crime Operatives (SOCO), iya ginpahayag nga ginpanaogan sang back rider si Obregon ka ginluthang apang nagdalagan pa ang kagawad palayo sa mga suspek.
Wala pa na kuntento ang gunman kag ginlagas pa si Obregon tubtob nga matiruhan niya ini.
Suno kay Roga, may yara sang igo sa natuo kag wala nga bahin sang dughan si Obregon kag may tatlo pa nga igo sa likod.
Natukiban naman ang siyam ka basiyo sang .45 caliber; duha ka slug kag tatlo ka live ammunitions.
Dugang pa sang natungdan, padayon pa nga ginapangita ang cellphone sang biktima bagud nakit-an sa Closed Circuit
Television (CCTV) footage nga nabuy-an ni Obregon ang iya nga cellphone samtang nagadalagan ini palagyo sa gunman.
Nahibaluan nga gindala pa sa ospital ang biktima apang ginbawian gid ini sang kabuhi.
Ang biktima ang gindakop sang nakaligad nga tuig bangud sa paghupot sang armas kag wala naman ini sang kaangtanan sa iligal nga droga.
