ILOILO CITY–Ginkumpirma sang Police Regional Office (PRO) 6 nga yara sa narco-list si anay Punong Barangay kag subong Barangay Kagawad Joel Obregon sang Pali-Benedicto, Mandurriao, Iloilo City.
Suno kay Police Lieutenant Colonel Joem Malong, tagpamaba sang PRO-6, nalakip si Obregon sa Prevendido drug group kag high value target (HVT) level 2 drug personality.
Ginagamit ni Obregon suno kay Malong ang iya pagka barangay official sadto bilang drug protector sang grupo.
Nakaagi man nga gin-raid ang balay ni Obregon sang Nobyembre 28, 2016 sang Criminal Investigation and Detection Group (CIDG) bangud sa kaso nga illegal possession of firearms apang gilayon nga nakaguwa ang barangay official matapos makapyansa.
Sang Mayo 2017 suno kay Malong, nagsungka si Obregon sa Oplan Tokhang.
Sa subong, wala pa sang identity ang Mandurriao PNP tuhoy sa mga suspek nga nagluthang-patay sa biktima.
