Gindakop sang International Operations Division sang National Bureau of Investigation (NBI) sa Candaba, Pampanga ang suspek sa pagpatay sa Overseas Filipino Worker (OFW) sa South Korea nga natukiban sa sulod sang septik tank.
Ang biktima amo si Michael Angelo Claveria, tumandok sang Barangay Poblacion Rizal Ilawod, Cabatuan, Iloilo.
Samtang ang suspek naman amo si Yugoslav Magtoto.
Suno kay Ronald Aguto, chief sang NBI Interpol, si Magtoto ang ginatudlo nga suspek sa pagpatay kay Claveria na una na nga ginapahayag na nadula ini sang tuig 2015.
Apang sang tuig 2018, may natukiban nga tul-an sa septic tank kag sang ginpaidalom ini sa DNA test, nakumpirma ini nga si Claveria.
Sa imbestigasyon sang South Korean police, nahibaluan nga si Magtoto ang ulihe nga nakaupod sang biktima.
Gina-alegar nga naluyag ang suspek sa biktima.
Apisar nadula na si Claveria, natukiban nga may nagagamit pa sang iya nga debit card kag nagakuha sang kwarta.
Nagpamalibad naman ang suspek nga maghatag sang pahayag bangud wala pa siya sang abogado.
Ginahulat na lang sang NBI ang extradition request sang South Korea agud nga maibalik sa ila nga pungsod si Magtoto agud atubangon ang iya kaso nga murder.
