Nagapangayo sang paghangop kag bulig ang Commission on Elections (COMELEC) sa mga pulitiko nga mangin responsable sa pagsunod sang guidelines tuhoy sa pagpaskil sang campaign poster.
Sa interview sang Bombo Radyo kay Mr. Jonathan Sayno, Assistant City Election Officer sang City COMELEC, iya ginpahayag nga kulang ang personnel sang COMELEC rason nga indi man nila maid-iran ang tanan nga lugar agud pangkakson ang mga illegally posted campaign materials.
Ginpahayag ni Sayno nga kun tani, sundon sang mga pulitiko ang tanan nga guidelines agud nga wala lang sang problema.
Kun ginpangkakas na ang mga illegally posted nga campaign materials, kun tani suno kay Sayno, indi na pag-itakod liwat sang mga pulitiko.
Magluwas sa lugar, dapat nga sundon man sang pulitiko ang gintalana nga size sang campaign materials nga 2×3 feet.
Padayon sa subong ang imbentaryo sang ahensya kun sin-o nga mga pulitiko ang malakip sa listahan sang violators kag mahimo nga makasuhan bangud sa paglapas sa pagsulundan.
