Padayon ang imbestigasyon sang otoridad tuhoy sa natabo nga pagkahulog sang Ceres bus sa pil-as sa Brgy. Igbucagay, Hamtic, Antique.
Sa interview sang Bombo Radyo kay Police Major Adolfo Pagharion, hepe sang Hamtic Municipal Police Station, iya ginpahayag nga ang tatlo ka mga napatay ang ginkilala nga sanday Evangeline Chicano sang Brgy. Guinbangaan, Laua-an, Antique kag ang mag-iloy nga sanday Vivien Omaño kag Earl Aaron Omaño sang Brgy. Borocboroc, Belison, Antique.
Santo sa pagpangusisa, ginapahayag nga ang isa sa mga napatay nga si Earl Aaron ang bag-o lang nag-graduate sa Senior High School sang John B. Lacson Maritime University samtang ang iloy naman nga si Vivien ang manunudlo sa Belison National High School.
Lakip sa 11 ka sakay sang bus suno kay Pagharion amo ang duha pa ka himata sang mag-iloy.
Ang mga pilason naman ang nagapabilin sa gihapon sa ospital kag ginadapatan sang nagakaigo nga pagbulong.
Kadungan sini, gin-athag ni Pagharion nga sa Brgy. Igbucagay natabo ang aksidente kag indi sa Brgy. Fabrica nga una nga gin-report.
Mahimo nga madasig ang pagmaneho ni Ramon Abellar sang Ceres Bus samtang yara sa likuon nga bahin sang Brgy. Igbucagay rason nga natabo ang aksidente.
