ILOILO CITY – Hugot ang nangin seguridad sang mga pulis sa pag-abot ni Presidente Rodrigo Duterte sa syudad sang Iloilo agud mangin dinapit nga bisita sa 25th National Federation of Motorcycle Clubs of the Philippines (NFMCP) sa Iloilo Convention Center (ICC).
Sakay sa Presidential chopper, ginabanta nga nag abot si Duterte sa syudad las 6:30 subong nga gab-i.
Antes pa man nagsugod ang programa, ginlantaw pa sang Presidente ang mga naka-display nga mga big bike models gikan sa nagkalain lain nga kompaniya nga yara sa lobby sang ICC.
Ginabanta 3,000 tubtob 4,000 ka mga motorcycle enthusiasts ang nagtambong ang gikan man sa nagkalain-lain nga bahin sang pungsod.
Si Duterte ang myembro sang “On Any Sunday Riders” (OASR) motorcycle club sa Davao City.
Una nga naghatag sang mensahe si Iloilo City Mayor Jose Espinosa III sa kahiwatan kag ginsundan man ini sang tuman nga pagpasalamat ni Dr. Ruben Ramirez, ang presidente sang national motorcycle clubs sa pagtambong sang Presidente.
Agaw atensyon man ang pila ka mga senatorial candidates sang Hugpong ng Pagbabago nga ginasuportahan ni Duterte.
