ILOILO CITY – Nagbilin sang mga panugyan si Presidente Rodrigo Duterte sa publiko kadungan sang 25th National Federation of Motorcycle Clubs of the Philippines (NFMCP) nga ginhiwat sa Iloilo Convention Center.
Suno kay Duterte, nagakadapat nga may yara sang law and order sa pungsod kag kinahanglan man nga ma untat ang graft and corruption sa gobyerno.
Ini bangud nga kun nagapadayon ang korapsyon, droga kag terorismo, mangin makaluluoy ang pungsod Pilipinas.
Dugang pa sang Presidente, indi siya interesado nga magpadugay pa sa patag sang pulitika bangud iya gin-ako nga nakapoy na siya.
Apang wala na niya gin-athag pa kun ano ang iya ginakakapoy.
Wala man nakahibalo ang Presidente kun bala masarangan pa niya nga matapos ang tatlo pa ka tuig nga nabilin sa iya nga termino.
Apang ginasiguro niya sa mga Pilipino nga mahimo lamang ini nga manaog sa iya nga pwesto kun tapos na ang iya nabilin nga tatlo ka tuig.
Samtang subong nga adlaw niya ipaguwa ang mga pangalan nga naangot sa korapsyon nga yara sa gobyerno.
Ginpahayag sang Presidente nga pahalinon niya sa pwesto ang mga government officials nga may kaangtanan sa korapsyon.
Naghingyo naman si Duterte sa publiko nga kun may nahibaluan nga korap, mahimo gid nga magpadulong ini sa Malacañang agud nga ma imbestigahan ang tawo nga ginatudlo korap.
Nagakadapat nga pakahuy-an kag sakiton ang tawo nga mapamatud-an nga korap agud nga indi na ini magliwat pa sa malain niya nga buluhaton.
