ILOILO CITY – Wala sa gihapon nakahatag sang pahayag si Iloilo City Mayor Jose Espinosa III tuhoy sa pagpakaayo sang mga children’s playground sa tagsa ka mga public plaza sa syduad sang Iloilo.
Ini matapos ang pahayag ni Dra. Kristine Gaona Treñas, chairman sang Iloilo City Heritage and Conservation Council (ICHCC), nga wala sang pahanugot ang pagpakaayo sang mga playground sa mga public plaza nga ginakabig cultural heritage.
Sa patas nga pagwaragwag, makapila ka beses nga ginlab-ot sang Bombo News Team si Mayor Espinosa apang wala gid sang sabat ang alkalde.
Gintinguhaan naman sang Bombo News Team nga kuhaan sang pahayag si Iloilo city Administrator Atty. Hernando Galvez kun ano ang iya pahayag bilang tiglawas ni Mayor Espinosa.
Sa ginpadala nga text message ni Atty. Galvez, iya ginpahayag nga pamulitika kag pagpangsabotahe lamang ang ginapaguwa nga malain nga istorya batok sa pagpahamtang sang bag-o nga mga playground.
Ginpahayag man ni Atty. Galvez nga bukas man si Mayor Espinosa kun may yara man sang reklamo tuhoy sa ginapatuman nga proyekto.
Nagakinahanglan nga ang mga tagreklamo suno sa City Administrator ang may yara sang sworn affidavit agud nga pormal nga makasabat ang kampo sang alkalde.
