Leon, Iloilo – Padayon nga ginapangita sang militar ang mga katapo sang New People’s Army (NPA) nga ila nga naka-engkwentro sa Brgy. Nalbang, Leon, Iloilo.
Sa exclusive interview sang Bombo Radyo kay Lt. Col. Joel Benedict Batara, commanding officer sang 61st Infantry Battalion sang Philippine Army, iya ginpahayag nga ang Sibat Platoon sang Komiteng Rehiyon Panay-Southern Front Committee nga ginapamunu-an ni Nahum Camariosa alyas Bebong ang naka-engkwentro sang mga suldado sa nasambit nga lugar.
Matapos ang 20 ka minutos nga pagbayluhanay sang lupok, nakit-an sang mga suldado suno kay Batara nga may yara sang tinulo sang dugo sa encounter site.
Mahimo suno kay Batara nga may yara sang pilason ukon napatay sa bahin sang NPA apang indi pa nila matumod kun pila ka bilog.
Lakip sa mga recoveries sa encounter site amo ang lima ka bag packs, duha ka Anti Personnel Landmines, duha ka magazine sang cal .45, isa ka magazine sang 7.62mm M14 nga may live ammunitions, Subversive documents kag medical paraphernalias.
Kun basehan ang mga nakaligad nga engkwentro sang Philippine Army kag NPA, may yara gid suno kay Batara sang mga nakalubong nga landmine sa encounter site.
Ini ang rason kun nga-a nagapatigayon sang clearing operations ang militar sa nasambit nga lugar agud nga wala sang may maulamid nga inosente.
