61st Infantry Hunter Battalion
Miag-ao, Iloilo – Nalakip na nga daan sa lugar nga may yara sang pamahog sang New People’s Army (NPA) ang detachment sang Citizen Armed Forces Geographical Unit (CAFGU) sa Brgy. Pudpud, Miag-ao, Iloilo.
Ini matapos ang pagsalakay kag pagsunog sang NPA sa duha ka motorsiklo nga ginapanag-iyahan sang CAFGU members.
Sa exclusive interview sang Bombo Radyo kay Police Major John Kenneth Tumambing, hepe sang Miag-ao Municipal Police Station, iya ginpahayag nga ang grupo nga Suyak Platoon sang Komiteng Rehiyon Panay-Southern Front Committee nga ginapangunahan nanday Ka Lex kag Ka Ronron ang nag-atake sa detachment unit sang CAFGU.
61st Infantry Hunter Battalion
Bag-o pa man ang natabo nga engkwentro suno kay Tumambing, nagapatigayon sang ‘change of sentinel duty’ ang mga CAFGU sang ila makita nga may yara sang nag-ibwal nga kalayo sa ubos nga bahin sang detachment.
Nagpanilag anay ang mga CAFGU member apang sa wala nila ginlauman, ginpaulanan na sila sang luthang sang mga NPA.
Bangud sini, nagbalos man ang mga CAFGU member kag ila nakita ang duha ka mga pinuno sang NPA sa lugar.
Sa kapin 20 ka minutos nga inaway, wala naman sang may napilasan ukon napatay sa bahin sang CAFGU.
