Miss Sunshine, ang babayi nga obsess sa duag yellow

CALIFORNIA – May yara kita sang tagsa ka duag nga nahamut-an.

Apang sa Los Angeles, California nangin obsession na sang 35 anyos nga babayi ang duag yellow.

Nag-umpisa nga nangin obsess si Ella London sa duag yellow sa sulod sang pito ka tuig bangud paborito man ini sang iya amay nga nagtaliwan.

Luyag ni Ella nga ginapalibotan siya sang duag yellow.

Sa sulod sang balay ni Ella, halos tanan nga mga gamit ang duag yellow lakip na ang iya mga panapton, sapatos, furnitures, decorations kag mangin ang iya salakyan.

Apisar nga may mga tawo nga ginakabig ang iya pagka-obsess sa duag yellow ang indi na normal, para kay Ella ang duag yellow ang nagbulig sa iya nga malikawan ang depression kag ini nga duag ang nagaserbe nga paglaum sa iya.

Ginkilala si Ella nga “Miss Sunshine” ukon “The Yellow Lady”.

Ang pagkolekta niya sang mga duag yellow nga mga gamit kag ang mapalibotan siya sang duag yellow ang nagahatag sang kalipay sa iya.