GUIMARAS – Fully-deployed ang mga police personnel sang Guimaras Police Provincial Office (GPPO) kadungan sa pagdagsa sang tawo sa Balaan Bukid sa Jordan, Guimaras buwas nga adlaw, Biyernes Santo.
Sa interview sang Bombo Radyo kay GPPO Director Police Col. Julio Gustilo, iya ginpahayag nga naglab-ot sa 554 ka police personnel lakip na ang augmentation force ang gin-deploy na agud nga magabulig sa pagbantay sang seguridad.
May yara man sanga ginpahamtang nga assistance centers kag checking area agud nga mapasiguro nga wala sang kontrabando ukon hinganiban nga dala ang mga nagapamalandong sa Balaan Bukid.
Kadungan sini, nagpahanumdum man si Gustilo sa mga magataklad sa Balaan Bukid nga likawan nga magdala sang backpack, hinganiban, makahulubog nga ilimnon kag ‘valuables’ kasubong sang daku nga kantidad kag mga malahalon nga alahas ukon ano man nga butang.
Kun mahimo, likawan man ang pagdala sang lapsag ukon kabataan agud malikawan ang pagsalangisag.
Indi man pagkalimtan suno sa natungdan nga magsuksuk sang komportable nga panapton kag magbalon sang tubig bangud sa tama ka singkal nga init sang adlaw.
