ILOILO CITY – Magapangonseho pa si Iloilo City Councilor Love-Love Baronda sa iya mga kaalyado sa konseho kun ano ang legal action nga ila pagahimuon.
Ini ang may kaangtanan sa pagdeklarar sang State of Calamity sa syudad sang Iloilo sa diin suno sa grupo nanday Baronda, wala sang quorum sa ginpatigayon nga special session.
Sa interview sang Bombo Radyo kay Baronda, iya ginpahayag nga ginakasubo gid niya nga nadayon gid ang pagdeklarar sang State of Calamity sa syudad sang bisan pa nga wala sang basehan.
Sa isyu pa lang sang quorum suno kay Baronda, makabig nga wala na sang kabilinggan ang ginpatigayon nga special session.
Magluwas diri, wala man sang balasehan ang pagdeklarar sang State of Calamity bangud nga apat gid lamang sa mga barangay sa syudad ang naghingyo sang dugang nga water supply.
Ang apat ka mga barangay suno kay Baronda ang wala man nagdeklarar nga ipaidalom sa State of Calamity ang ila lugar.
Isa man sa punto ni Baronda amo nga 18.5 hectares gid lamang gikan sa 379 hectares nga agricultural land ang apektado sang tig-ilinit.
Wala man nakalusot ang pagpatigayon sang Rapid Damage Assessment and Needs Analysis sang kampo nanday Iloilo City Mayor Jose Espinosa III nga suno sa konsehal, wala nagsunod sa nagakaigo nga proseso.
