Nagreklamo ang mga katapo sang Partido Demokratiko Pilipino – Lakas ng Bayan (PDP LABAN) matapos ginapahayag ginharass sang mga tinawo ni anay Barotac Nuevo Mayor Hernan Biron Sr. sa Barangay Bungca, Barotac Nuevo, Iloilo.
Sa interview sang Bombo Radyo kay anay punong barangay Antonio Parcon, isa sa mga nagapapili bilang Sangguniang Bayan (SB) member sa nasambit nga banwa, nagahambal siya sa microphone sang gulpi lang nagsulod ang tatlo ka mga persona nga sanday Bernie Villanueva, Roger Villanueva kag Roger Dayan kag natabo na ang pagtaya sa iya sang armas luthang.
Si Bernie Villanueva suno kay Parcon ang nakilala sini nga nagtaya sa iya sang armas apang, ginhaboy niya ini sang nag abot na ang mg pulis.
Suno kay Parcon ginahambal man lang niya sa ila causus kun ano ang matuod nga nagakalatabo sa ila banwa.
Pahayag pa ni Parcon, halos anom lang ka metro ang distansya niya sa tatlo ka mga persona nga responsable sa pagpanaya sang armas.
Dugang pa sang natungdan, antes naman nagkadto sa caucus ang tatlo ka tinawo ni Biron, una na nga nagpangharass ang mga ini sa Barangay Cruz sa nasambit nga banwa.
Madamo naman suno kay Parcon ang nakakita nga ginharass ang ila grupo sang tinawo ni Biron.
Gilayon naman nga nagresponde ang Barotac Nuevo Municipal Police Station sa insidente.
