ALIMODIAN ILOILO – Gin-ako sang New Peoples Army(NPA) ang pagsulong sa Highway Police Assistance Desk (HIPAD) sa Barangay Bancal Alimodian Iloilo.
Sa official statement nga ginpagwa sang kampo sang mga rebelde gin-ako mismo sang Napoleon Tumagtang Command ang ginhimo nga pagraid sa HIPAD sang police.
Nahibaluan nga gintayaan sang anom ka katapo sang nasambit nga grupo si Police Corporal Janjan Anaya kun sa diin ila ini nga ginbaklid kag gingapos sang duct tape ang kamot lakip na ang pwersa nga pagkuha sang service firearm sang pulis nga ginalakipan sang m16 armalite rifle nga may lima ka magazine kag live ammunitions, 9mm nga may duha ka magazine kag live ammunitions, handheld radio, cellphone kag backpack.
Suno pa sa nasambit nga command sang rebelde madinalag-on ang ginhimo nila nga pag-raid kag ini isa ka mapatuod nga wala naghuyang ang pwersa sang NPA.
