CONCEPCION, ILOILO – Nagapati si Concepcion, Iloilo Mayor Milliard Villanueva nga wala sang may natabo nga pagpamahog sa ila ginhiwat nga caucus sa nasambit nga banwa.
Sa interview sang Bombo Radyo kay Mayor Villanueva, nga yara sa kampo sang Nationalista Party, iya ginpahayag nga supporter sang pihak nga grupo nga Partido Demokratiko Pilipino–Lakas ng Bayan (PDP-Laban) ang nagtambong sa ila nga caucus kag nag kuha sang mga litrato.
Ginsaway lamang ang supporter nga indi magkuha sang litrato bangud kaangay nga daw nagaserbe siya bilang espiya sang pihak nga kampo.
Suno kay Villanueva, kuntani nagapamati lang ang supporter sang pihak nga grupo kag wala na nagkuha sang litrato.
Gin-athag sang alkalde nga ginsaway lamang kag ginpahalin sa caucus ang supporter kag wala gin-harass ukon ginpamahog.
Nahibaluan nga nagpabalhag ang supporter nga nagpahinago sang iya nga pangalan sa Concepcion Municipal Police Station bangud sa gina-alegar pagpamahog sa iya.
Si Villanueva ang magapadalagan bilang bise alkalde sa Concepcion sa maabot nga May 13 elections.
