SARA ILOILO- Nagpablotter sa Sara Municipal Police Station ang punong barangay sang Preciosa sang banwa sang Sara matapos makabatun sang ginapasuni pagpamahog sa isa ka mayoralty candidate sa nasambit nga banwa.
Sa interview sang Bombo Radyo kay Police Captain Ascencion Ortizo, iya ginpahayag nga nagpablotter sa ila si Punong Barangay Ronnie Dordi sang Barangay Preciosa bangud sa ginapasuni pagpamahog nga iya nabatun.
Suno kay Ortizo, ginsaysay ni Dordi nga sadtong Abril 29 nagkadto sa nasambit nga barangay agud maghiwat sang caucus ang grupo nanday General Jon Aying kun sa diin luyag sang anay heneral nga magpaupod kay Dordi, apang ginsabat siya sang punong barangay nga non partisan ini kag wala sang may gina-apinan nga kandidato.
Pahayag pa ni Ortizo , may isa ka tawo nga nakitaan sang armas sa posisyon sini ang gin-identify bilang driver mismo sang heneral.
Sang nagkomprontahanay ang ila kampo, didto na kag may nahulog pagid nga calibre 38 nagikan sa isa man ka ginapahayag tinawo sang heneral.
