JANIUAY ILOILO- Naghatag sang iya kaugalingon nga panan-awan ang isa ka abogado may kaangtanan sa desisyon sa kaso ni anay Janiuay Mayor Frankie Locsin kun sa diin ginkwestyon ang bidding kag procurement sang mga bulong.
Sa interview sang Bombo Radyo kay Atty. Rene Villa, ang abogado nga ginpangayuan sang alkalde sang legal opinion, iya ginpahayag nga duha ka kaso kag duha man sa GR numbers ang ginpasaka kag ini ang ginalakipan sang petition for review of certiorari sa demurrer to evidence sa diin ini ang gindeny kag ang conviction sa kaso.
Suno kay Villa ang gindeny lang kag ang gin-isyuhan sang entry of judgement ang sa bahin sang demurer apang ang sa bahin sang conviction ang wala pa nadesisyunan sa diin may yara pa sang nabilin nga mga incidents.
Nagapati si Villa nga kun ang sa demurer lang ang gindeny indi pa disqualified bilang kandidato si Locsin.
Pahayag pa ni Villa , kun wala pa mabatun sang abogado sang duha ka partido, indi pa ini pinal bangud kinahanglan pa nila ini batunon.
Dugang pa niya, kun indi pa makapagwa sang order ukon deklarasyon ang Commission on Elections (Comelec) nga disqualified na si Locsin , kwalipikado man ini sa gihapon kag ang tanan nga boto nga makuha pabor kay Locsin ang makabig nga counted.
Ang Comelec lang suno kay Villa ang makahibalo kun bala magapabilin pa nga kandidato sa piniliay ang isa ka pulitiko ukon indi na.
Entitled man suno sa iya si Locsin sang substitution apang kun wala pa ini nabatun sang kampo mismo sang natungdan kag sang abogado sini, indi matigayun ang substitution sang candiates.
