ILOILO CITY- Naghatag sang sabat si Iloilo City Mayor Jose Espinosa III may kaangtanan sa nagluntad nga pagpangdapal sa iya niya ka supporter samtang nagapatigayun sang pagpangampanya sa Barangay Rizal Pala-Pala II Iloilo City Proper.
Sa exclusive interview sang Bombo Radyo kay Mayor Espinosa, iya ginpahayag nga iya man ginkakibot ang nagluntad nga pagdapal kag pagpangguramos nga ginhimo sang asawa ni punong barangay Noel Soliman kay Kagawad Gigi Balgos.
Suno kay Espinosa, tupaday gid sila sa paglakat ni kagawad Gigi samtang naga house to house sa nasambit nga barangay kag siya mismo ang nabagrasan man kag dyutayan lang man kuntani natumba.
Ginhambalan naman niya ang iban pa nila nga kaupod nga indi nalang magbalos agud indi na magdako pa ang ginamo.
Sunu kay Espinosa gamay lang man kuntani nga respeto ang iya ginpangayo bangud ara man siya nga alkalde sang syudad
Pahayag pa ni Espinosa nga indi niya pagtugutan ang pagdisrespeto sa nga ginahimo sang mga poderoso nga tawo sa mga pumuluyo.
Nahibaluan nga posible may kaangtanan ang insidente sa ginpagwa nga impormasyon ni Mayor Espinosa tuhoy sa nagakatabo nga pagpangilkil sa sulod mismo sang Iloilo Terminal Market (super).
