ILOILO CITY – Nagalaum ang defense lawyer sang Food and Drug Administration (FDA) nga ibasura sang korte ang ikatatlo sa walo ka kaso nga ginpasaka sang Public Attorney’s Office (PAO) may kaangtanan sa Dengvaxia controversy.
Sa exclusive interview sang Bombo Radyo kay Atty. Emmanuel Brutarlo, isa sa mga legal counsel sang Center for Drug Regulation and Research sang FDA, iya ginpahayag nga duha na sa walo ka mga kaso nga ginpasaka sang PAO ang ginbasura bangud sa rason nga ‘lack of jurisdiction’.
Sa pagpaathag ni Atty. Brutarlo, ‘lack of jurisdiction’ ang rason bangud nga ang kaso ang ginpasaka sang PAO sa Metropolitan Trial Court sa baylo nga sa Sandiganbayan.
Ini bangud nga ang mga akusado suno kay Atty. Brutarlo ang may matag-as nga posisyon sa gobyerno ukon may sweldo nga indi magnubo sa salary grade 31.
Magluwas nga ang mga akusado ang may mataas nga posisyon sa gobyerno, ang kaso tuhoy sa Dengvaxia controversy ang makabig nga ‘office related cases’.
Ginpahayag man sang natungdan nga una na nila nga nabaton ang abiso gikan sa Muntinlupa kag Calooocan Trial Court nga ginbasura na ang kaso kag buwas naman nga adlaw, Mayo 10, patigayunon ang hearing sa Bataan Trial Court.
Ginalauman man nila suno kay Atty. Brutarlo nga ibasura man sang korte ang kaso bangud sa kasubong nga rason kag nga maathag nga ginpadali-an lang sang PAO ang pagpasaka sang kaso.
