SARA, ILOILO – Kritikal ang kondisyon sang punong barangay sang Preciosa, Sara, Iloilo matapos nga gintiro sang ginapatihan riding in tandem.
Ang biktima amo si Punong Barangy Ronnie Dorde.
Sa interview sang Bombo Radyo kay Jenylyn Cabaluna, sekretarya sang barangay, iya ginpahayag nga una niya nga nakit-an ang riding in tandem nga nagasunod sa motorsiklo ni Edgardo Somera nga barangay lider ni Retired Army General Jon Aying nga amo ang nagapadalagan bilang alkalde sa Sara, Iloilo.
Suno kay Cabaluna, ang motorsiklo nanday Somera kag ang ginapahayag riding in tandem ang nagpadulong sa balay ni Brgy. Kagawad Rolando Tikyan nga ginapatihan supporter man ni General Aying.
Nag-istoryahanay pa nanday Dorde kag Somera sa handset nga makitaay sila personal nga duha samtang yara ang barangay lider sa balay ni Tikyan.
Dugang pa sang sekretarya, sang nakaguwa na ang mga ginapatihan riding in tandem, madasig ang dalagan sang ila motorsiklo nga nagapadulong sa balay sang punong barangay.
Ginbalabagan pa kuntani sang brgy tanod ang motorsiklo apang ginhanaan sang riding in tandem suspects nga bungguan ang tanod.
Sang nakit-an sang mga suspek si Dorde, ang duha ka lalaki sakay sa motorsiklo ang nanaog kag gintiro ang punong barangay.
Ginapahayag tatlo ka lupok ang nabatian ni Cabaluna.
Natumba pa ang motorsiklo sang mga suspek kag nagdalagan na lang ang mga ini.
Nagbangon, nagdalagan kag nagsinggit pa si Dorde.
Indi kilala ni Cabaluna ang mga suspek nga nagtiro sa punong barangay.
Nagapati ang barangay secretary nga ginplanuhan nga luthangon si Dorde apang wala siya nakahibalo kun ano ang motibo sang pagtiro sang mga suspek.
Sa subong, nagapatigayon na sang hot pursuit operation ang Sara Municipal Police Station agud madakpan ang mga suspek.
Nahibaluan nga nagpa blotter si Dorde sa Sara PNP sang Mayo 1 bangud sa gina-alegar pag pang harass ni Gen. Aying sa iya sa pagpamilit nga mag-upod grupo sang mayoralty candidate.
Samtang suno naman kay Police Captain Asencion Ortizo, hepe sang Sara PNP, iya ginpahayag nga ginsita ni Dorde ang mga lalaki nga nakasakay sa motorsiklo sa diin nagbato man ang mga lalaki rason nga gintiro ang punong barangay.
Lakip man sa ginapangita sang mga pulis amo si Somera bangud sa ginapahayag sang pamilya ni Dorde nga kaupod sang riding in tandem suspects.
May yara naman sang isa ka igo sa tyan ang punong barangay.
