SARA, ILOILO – Ginkumpirma sang mayoralty candidate sang Sara, Iloilo nga iya tinawo ang isa sa mga ginatudlo suspek sa pagtiro sa punong barangay sang Preciosa, Sara, Iloilo.
Ang biktima amo si Punong Barangay Ronnie Dorde.
Sa interview sang Bombo Radyo kay Retired Army General Jon Aying, nagapadalagan bilang alkalde sa nasambit nga banwa, iya ginpahayag nga barangay lider niya sa Preciosa si Edgardo Somera nga nalakip sa mga suspek nga ginapangita sa subong sang mga kapulisan.
Suno kay Aying, wala siya sang kahilabtanan sa pagtiro sa punong barangay kag wala man siya una nakahibalo sang natabo.
Dugang pa sang heneral, wala siya sang may ginmandu nga ubrahon ang pagluthang kay Dorde bangud ang luyag lamang niya ang matawhay nga eleksyon.
Sa subong, ginatugyan na lamang ni Aying sa mga otoridad ang natabo sa punong barangay.
