ILOILO CITY– Gindakop sang Criminal and Investigation and Detection Group (CIDG)- Iloilo ang duha ka persona matapos nakuhaan sang ginapahayag 74 kilos nga gold bars sa Barangay Bangac, Mina, Iloilo.
Ang mga nagkaladakpan ang ginkilala nga sanday Joel Unabia, 50, sang Banate, Iloilo kag Ma. Yovhhabel Vidal, 60, sang Roxas City, Capiz.
Suno kay Police Lt. Col. Anthony Gantang, sang CIDG-Iloilo, nadakpan ang duha pinaagi sa isa ka entrapment operation matapos magdemand sang P10 million.
Natigayun naman nga nahatag sang CIDG sa mga suspek ang boodle money kag dugang nga P1,000 kabaylo sang 74 kilos nga ginapahayag gold bar.
Ginabanta nagdangat sa 4x4x16 inches ang kadakuon sang nasambit nga gold bar.
Nakuha man sa duha ka mga suspek ang isa ka unit sang .45 caliber pistol, isa ka magazine kag mga bala sang .45 caliber pistol kag, isa ka unit sang Nissan Navarra nga salakyan nga may plate number FGR 914 kag isa ka holster sang .45 caliber pistol.
Magapangatubang naman sang kaso nga syndicated estafa ang duha ka mga suspek.
Ipaidalom naman sa verification sang CIDG-Iloilo kun bala matuod nga bulawan ang nasambit nga gold bar.
