ILOILO CITY – Nagapati si incoming Iloilo City Councilor Atty. Romel Duron nga daku nga bentaha ang iya pagka-abogado sa Sangguniang Panlunsod.
Sa interview sang Bombo Radyo kay Duron, iya ginpahayag nga nakahibalo siya sang mga trabaho sa konseho kaangay na lang sa pagbalay sang mga ordinansa.
Apang apisar nga nakahibalo na siya sa mga ordinansa, kinahanglan niya sa gihapon ini nga matun-an bangud ang konsehal nga wala nakahibalo sa pagbalay sang ordinansa, mahimo nga mangin invalid ang pagpasar sini kag may posibilidad pa nga mangin iligal.
Suno kay Duron, antes pa man siya nga nangin madinalag-on sa pulitika, siya na ang nagabulig sa mga pumuluyo pinaagi sa paghatag sang libre nga notaryo sa mga nagakinahanglan.
Magluwas bilang abogado, luyag man nga hatagan sang igtalupangod ni Duron ang turismo kag kaayohan para sa mga pumuluyo sa syudad.
Plano man sang grupo ni Duron nga magpatukod sang ospital sa syudad amo man ang dialysis center sa kada distrito.
Sa pihak nga bahin, madamo nga mga tawo dugang pa ni Duron ang nagpanugyan sa iya nga nagakabagay siya nga magkapot sang Committee on Transportation.
Gin-ako sini nga tuman ka kumplikado ang bahin sang transportasyon.
