ILOILO – Peke ang gold bar nga nakuha sang Criminal Investigation and Detection group (CIDG)- Iloilo sa duha ka mga suspek sa Barangay Banga, Mina, Iloilo.
Ang mga nagkaladakpan ang ginkilala nga sanday Joel Unabia, 50 anyos sang Banate, Iloilo kag Ma. Yovhhabel Vidal, 60 anyos sang Roxas City, Capiz.
Sa interview sang Bombo Radyo kay Police Lt. Col. Anthony Gantang, pinuno sang CIDG, iya ginpahayag nga ang gold bar nga nagabug-at sang 74 kilos ang ila nga ginpalantaw sa eksperto kag nahibaluan nga ini ang peke.
Suno kay Gantang, luyag nila nga ipatan-aw pa gid sa iban nga eksperto ang nakuha nga gold bar ukon sa ahensya sang gobyerno nga may yara sang ikasarang sa paghibalo kun bala bulawan ang ila nakuha ukon indi.
Ginabanta 4×4 ang kadamulon sang gold bar kag may laba nga 16 inches.
Dugang pa sang natungdan, natalana na nga mapasakaan sang kaso nga Illegal Possession of firearms kag syndicated estafa ang mga suspek sa Lunes nga adlaw.
Nahibaluan nga nadakpan ang duha ka mga suspek pinaagi sa isa ka entrapment operation matapos magdemand sang P10 million kabaylo sang gold bar.
