ILOILO CITY– Wala pa sang identity ang kapulisan sa kun sin-o ang nagpatay sa magtiyo nga nasapwan nga tadtad sang luthang sa Barangay Balabago Jaro Iloilo City.
Sa interview sang Bombo Radyo kay Police Captain Eduardo Siacon, hepe sang Jaro Police Station, iya ginpahayag nga sa iya pagpangusisa sa San Isidro Jaro, indi maayo ang background ni Jimrod Eribal sa nasambit nga barangay.
Suno kay Siacon naangot man si Jimrod sa serye sang pagpangawat nga syudad kag naobserbahan man ini nga nagagamit sang iligal nga droga.
Ginapahayag nga miyembro man sang isa ka robbery hold-up gang ang napatay nga si Jimrod Eribal.
May nakuha man sila nga cctv footage suno kay Siacon apang sa subong nabudlayan sila magtumod sa mga suspek bangud nakatalikod kag wala pa sang plaka ang salakyan nga gingamit.
Samtang ginkilala sang Punong Barangay sang Caingin Lapaz nga isa ka maayo nga tawo ang isa sa mga biktima nga nasapwan patay kag tadtad sang bala ang lawas sa barangay Balabago Jaro Iloilo City.
Sa interview sang Bombo Radyo kay Punong Barangay Rene Firmeza, iya ginpahayag nga maayo nga tawo si Christian Eribal sa iya pagkilala bangud didto ini nagdako sa iya barangay.
Suno pa kay Firmeza, maayo ang rekord ni Eribal kag ini ang basketball player pa sa Caingin Lapaz.
Dugang pa ni Fermiza nga iligalista ang mga tawo nga nagpatay kay Tristan kag sa tiyo sini nga si Jimrod Eribal.
Ginpasigurado naman sang natungdan nga mahatagan sang hustisya ang kamatayon ni Tristan kag sang tiyo sini.
