JANIUAY, ILOILO – Indi magnubo sa duha ka balay ang naguba samtang nagkalatumba naman ang mga dalagku nga puno sang kahoy matapos naigo sang ginapahayag buhawi sa Brgy. Balanac, Janiuay, Iloilo.
Nagtabog ang atop sang balay nga ginapanag-iyahan ni Rudy Manejero samtang naguba naman ang balkon sang balay nga ginapanag-iyahan ni Mary Ann Jinon.
Sa exclusive interview sang Bombo Radyo kay Manejero, iya ginpahayag nga bag-o pa man nag-igo ang buhawi kaina sang hapon, nagbubo anay ang mamunog nga ulan sa ila lugar.
Samtang nagadugay suno kay Manejero, nagapabalik-balik ang pagmadlos sang hangin tubtub nga nagkalatabog ang sin nga atop sang ila balay.
Ginpaanggid naman ni Manejero sa ginlukot nga amakan ang sin nga atop bangud sa kabaskugon sang hangin.
Agud nga makalikaw sa kalalat-an suno kay Manejero, sa sulod na lang sang sementado nga Comfort Room niya ginpatinir ang tatlo ka mga apo.
Maswerte man suno sa iya bangud nga lima lamang sila ang nabilin sa ila balay sang natabo ang insidente.
Sa pagpaathag naman ni Dr. Jerry Bionat, pinuno sang Provincial Disaster Risk Reduction and Management Office (PDRRMO), indi buhawi ang nag-igo sabaylo, ini ang pagmadlos lamang sang hangin.
