JANIUAY, ILOILO – Ginatipon na sang Barangay Council sang Balanac, Janiuay, Iloilo ang kabug-usan nga halit nga gintuga sang mamunog nga ulan kag mamadlos nga huyop sang hangin nga nag guba sang pila ka balay sa nasambit nga lugar sang damlag lang.
Sa exclusive interview sang Bombo Radyo kay Punong Barangay Reynaldo Espia, iya ginpahayag nga nagpatigayon sang ‘inspection’ ang mga tiglawas sang Municipal Disaster Risk Reduction and Management Office (MDRRMO) sang Janiuay, Iloilo sa ila lugar.
Bangud sini, ginpanugyan sang MDRRMO suno kay Espia nga magpasa sang report tuhoy sa kahalitan nga tuga sang nasambit nga kalamidad.
Kun makapasa na sang report suno kay Espia, nagpromisa Local Government Unit (LGU) sang Janiuay, Iloilo nga magahatag sang bulig sa mga apektado nga pumuluyo.
Magluwas diri, nagbuligay man ang mga pumuluyo agud nga mabalik ang atop sang balay ni Rudy Manejero nga isa sa mga naapektuhan sang kalamidad.
Nahibalu-an nga indi magnubo sa duha ka balay ang naguba samtang nagkalatumba naman ang mga dalagku nga puno sang kahoy bangud sa mabaskog nga huyop sang hangin.
