Wala naluyagan sang engaged couple nga sanday Rodjun Cruz kag Dianne Medina ang mga komento sang pila ka mga netizens may kaangtanan sa biyahe nila sa Japan kaupod ang delegasyon ni Presidente Rodrigo Duterte.
Sa subong yara sa Japan si Duterte kaupod ang mga cabinet members kag pila pa ka mga opiyales sang gobyerno para sa apat ka adlaw nga working visit kadungan sang 25th Nikkei International Conference.
Ang conference ang nag-umpisa sang Martes, Mayo 28 kag magatapos subong nga Mayo 31.
Magluwas sa delegasyon sang Presidente, yara man sa Japan ang pila ka mga celebrity supporters nga sanday Robin Padilla, Philip Salvador, Bayani Agbayani, Michael Pangilinan, Martin Escudero, kag ang engaged couple nga sanday Rodjun kag Dianne.
Suno kay Philippine Ambassador to Japan Jose Laurel V, ang Nikkei ang naggasto sa biyahe sang Presidente.
Samtang gindepensahan naman sang engaged couple ang mga pagpakamalaot sa ila sang netizens.
Suno kay Rodjun, may yara siya sang kinamatarong nga mag post sang picture sa social media bangud sila ang nagbayad sang ila nga trip padulong sa Japan para sa Filipino Community meet and greet nga gintambongan sang Presidente.
Ginpanginwala naman sang Malacañang ang naguwa nga impormasyon nga regalo sang Presidente sa cabinet members kag iban nga mga delegasyon ang pagpadulong sa Japan bangud nangin madinalag-on ang iya gin-endorso nga mga kandidato sang eleksyon.
