ILOILO – Pormal na nga gindeklarar ang state of calamity sa Probinsya sang Iloilo bangud sa epekto sang El Niño.
Ini ang ginduso mismo ni 1st district Board Member Valentin Serag nga amo ang nagapungko bilang Chairman sang Committee on Disaster Risk Reduction and Management sang Sangguniang Panlalawigan.
Ginpaboran naman ini ni 4th District Board Member Dominggo Oso Jr nga amo ang nagapungko bilang majority floor leader.
Wala naman sang may nagpamalabag sang gin-usisa ni Vice Governor Christine Garin kun may nagapamatok sa pagpasar sang nasambit nga resolusyon.
Nagakahulugan naman nga aprubado na P31.4 million ang mitigating measures para sa mga apektado sang El Niño.
Ini ang ginabug-usan sang P10.8 million para sa agrikultura nga gamiton agud ibakal sang liquid organic fertilizer ; P13 million para sa social service ukon food for work; P100, 520 para sa health impacts kaangay sang water borne diseases; P4 million para sa jetmatic pumps; P2 million para sa anti-bacterial, vaccines; P500,000 para sa Information Education Campaign, fireline, kag guarding kag P500,000 para sa brochures sang Information Education Campaign campaign.
Nahibaluan nga nagadangat na sa 1.2 billion ang halit nga natuga sang El Niño sa probinsya sa partikular sa palay, mais, kag high value commercial crops.
Masobra 456,000 naman ka mga mangunguma nga may pamilya ang apektado sang kalamidad.
Samtang, 39,000 ka ektarya ang apektado sang El Niño.
