ILOILO CITY – Amat-amat naman nga nagapuraot ang kita sang mga driver sang depampasahero nga jeep sa syudad sang Iloilo may kaangtanan sa pagsaka sang presyo sang gatong.
Sa interview sang Bombo Radyo kay Reymundo ‘Boyet’ Parcon, presidente sang Iloilo City Loop Alliance of Jeepney Owners and Driver’s Association (ICLAJODA), iya ginpahayag nga bisan nga nagtaas ang pamasahe apang pigado sa gihapon ang kita sang mga driver.
Ini bangud nga ang saka sa pamasahe ang mas manubo sa ginasaka sa presyo sang gatong sa diin halos sa tagsa ka semana, may yara sang oil price hike.
Magluwas diri, wala pa sa gihapon nabaton sang mga driver ang subsidy nga ginpromisa sang gobyerno.
Bangud sini, ginpahayag ni Parcon nga mahimo nga magapatigayon sang pagsinapol ang tanan nga transport group sa Western Visayas tuhoy sa ila lihok nga himuon may kaangtanan sa pagsaka sang presyo sang gatong.
