AJUY, ILOILO – Natigayon nga madakpan sa Ajuy, Iloilo ang suspek sa paghimulos, pagpatay, pagsulod sa sako kag paghal-id sa basurahan sa pito ka tuig nga bata sa Victorias City, Negros Occidental.
Ang suspek ang ginkilala nga si Mark Besa, 39 anyos.
Sa interview sang Bombo Radyo kay Police Major Jan Van Herson Luspo, hepe sang Ajuy Municipal Police Station, iya ginpahayag nga may nakakita kay Besa nga nagsakay sa pump boat padulong sa Iloilo rason nga nagkooperar ang Victorias PNP sa Ajuy PNP.
Suno kay Luspo, may yara sang himata sa Ajuy ang suspek sa diin siya nagpalagyo.
Gin-validate gilayon sang Ajuy PNP ang impormasyon nga ila nabaton kag natultulan an g lugar nga ginapanagoan ni Besa sa Brgy. Pili, Ajuy.
Dugang pa sang hepe, sa pagkadakop kay Besa, ini siya ang ginbalik sa Victorias City.
Nahibaluan nga antes pa man ginpatay ang bata, ginsugo pa siya ni Besa nga magbakal sang sigarilyo apang wala na ini nakabalik pa.
Nagapati ang pamilya sang biktima nga si Besa mismo ang nagdala sa bata.
Samtang kumpirmado naman nga ginhimuslan ang bata santu sa autopsy report sa bangkay.
Magluwas sini, natukiban man nga may banog ang natuo nga nawong kag wala nga butkon, ginlubag ang liog kag may pilas ang kinatawo sang pito ka tuig nga bata.
Samtang, gin-ako naman sang suspek nga siya ang may kahimuan sa nasambit nga krimen suno kay Police Master Sergeant Hazel Dorado, ang chief sang Women and Children’s Protection Desk sang Victorias City Police Station.
