Nagpamalibad ang Metro Iloilo Water District(MIWD) nga bayaran ang balor P1.6 million pesos nga tubig nga ginsuplay sang Flowater Resources Iloilo, Inc., sa sulod sang walo ka adlaw.
Sa interview sang Bombo Radyo kay Joseph Dalmacio sang Flowater Resources Iloilo, Inc., iya ginpahayag nga ini ang rason kun ngaa nag-untat anay ang distribusyon sang tubig sa nasambit nga bulk water supplier sa MIWD.
Suno kay Dalmacio, nag-ugat ang problema sang ginreklamo sang MIWD ang indi tin-aw nga tubig nga nagahalin sa Flowater.
Apang suno kay Dalmacio, apisar may yara sang kolor ang tubig, pasado ini sa bacteriological test kag aprubado sang chemist sang Flowater nga safe ini imnon.
Ginpahayag pa ni Dalmacio nga ginapamilit man sang MIWD nga dapat mangin puro ang duag sang tubig apang suno sa iya, kun ila ini himuon, masobrahan sila sa paggamit sang kemikal kag mabutang sa peligro ang mga tawo nga magakonsumo sang tubig.
Gindugang man sang natungdan nga ginapasa man sang MIWD sa Flowater ang katungdanan nga i-monitor ang tubig nga ginasuplay sini nga suno kay Dalmacio,responsibilidad na sang MIWD kag ini ang nasaad sa ila kontrata.
