Ginpanginwala ni outgoing Janiuay, Iloilo Vice-Mayor Jojo Lutero nga siya ang sa likod sang pagpaaresto sa mayor-elect sang nasambit nga banwa nga si Frankie Locsin.
Sa exclusive interview sang Bombo Radyo Iloilo kay Lutero, ginklaro niya nga isa lamang siya ka ordinaryo nga abogado kag wala sang poder nga magdikta sa Korte Suprema.
Suno kay Lutero, ang iya lang ginhimo amo ang paghingyo sa Commission on Elections (Comelec) nga i-disqualify ang kandidatura ni Locsin kag sang nagdaug ini, liwat naman niya nga ginhingyo nga isuspende ang proclamation sini bilang alkalde bangud maathag suno sa iya nga indi nagakadapat nga mangin mayor bangud may ginakaulamiran ini nga kaso.
Dugang pa ni Lutero,maathag ang desisyon sang Korte Suprema batok kay Locsin nga perpetual disqualification from public office kun sa diin nagakahulugan ini nga indi mahimo magboto kag magpapili sa ano man nga posisyon sa gobyerno ang nasambit nga alkalde.
Nahibaluan nga ang nasambit nga desisyon ang nag ugat sa paghatag sang medical supplies sa balor P15 million gikan sa Priority Development Assistance Fund ni Sen. Vicente Sotto III sang 2001 kun sa diin si Locsin pa ang nagapungko nga presidente sang Leauge of Municipalities of the Philippines Iloilo Chapter.
Ginpabakod naman sang Korte Suprema ang desisyon sang Sandiganbayan tuhoy sa kaso nga graft sang alkalde sang 2015.
