ILOILO CITY – Madugay na nga problema sa Philippine Health Insurance Corp. (PhilHealth) ang “ghost dialysis treatments”.
Sa exclusive interview sang Bombo Radyo kay Iloilo 1st District Congresswoman-elect Janette Garin, iya ginpahayag nga ang kurapsyon sa PhilHealth ang kasubong sang isa ka balati-an nga wala sang bulong kag nagakinahanglan na nga matapna.
Sa pagkamatuod suno kay Garin, humalin sang siya pa ang Board Member sang tuig 2,000, nakitaan na niya sang anomaliya ang PhilHealth.
Sang nahatagan siya sang kahigayunan nga mangin tiglikom sang Department of Health (DOH) sang tuig 2014 tubtub 2016, ginpahayag ni Garin nga iya nga ginmandu ang “stop payment” agud nga matapna ang ‘bogus claims’ kag agud nga indi na maka-angkon sang kahigayunan ang mga kurap nga health providers kag doctors nga makapangwarta.
Magluwas diri, ginpahayag man sang natungdan nga iya man nga ginmandu
ang pag-ilis sang manual recording sa computer-based system agud nga madali nga matukiban kun may yara sang anomaliya.
Bangud sa ‘ghost dialysis’, apektado man ang iban pa nga claims kasubong sang pneumonia, katarata kag dengue patients.
Ang masubo lang suno kay Garin amo nga mas ginsakyan sang iban nga pulitiko ang tuhoy sa Dengvaxia rason nga nalapawan na ang isyu sang kurapsyon sa PhilHealth.
Gin-athag man ni Garin nga may yara siya sang mga pamatuod sa iya ginpangbuyagyag batok sa PhilHealth kag handa siya nga ipakita ini sa publiko kun kinahanglanon.
