Nagapati ang Mandurriao Police Station nga nangin patas sila sa kaso sang mag-asawa nga nabungguan-patay sang Mazda MX5 sports car sa Diversion Road, Mandurriao Iloilo City.
Ang mga biktima amo sanday Alnie Dinah Osano kag Joe Marie Osano samtang ang suspek naman amo si June Paul Valencia.
Sa interview sang Bombo Radyo kay Police Staff Sergeant Rey Amihan, imbestigador sang Mandurriao PNP, iya ginpahayag nga madamo sang mga dokumento nga kinahanglanon antes makapasaka sang kaso ang pamilya sang mga biktima kag wala pa ini tanan na kumpleto.
Suno kay Amihan, wala pa sang mga death certificate, autopsy report kag iban pa nga dokumento ang pamilya sang mga biktima rason nga wala madayon ang pagpasaka sang kaso.
Nagapanindugan man ang imbestigador nga ginpaathag na sa pamilya sang mga biktima nga ang kaso sang suspek ang bailable ukon mapiyansahana.
Samtang nagtawag ang abogado sang pamilya sang mga biktima kay Iloilo City Police Office (ICPO) Director Police Colonel Martin Defensor Jr. agud nga mangayo sang bulig.
Suno kay Defensor, iya ginpalab-ot kay Police Major Marlon Valencia, hepe sang Mandurriao PNP, nga ihanda ang tanan nga kinahanglanon nga dokumento sa pagpasaka sang kaso batuk sa suspek.
Nahibaluan nga wala na makaabot pa sa pagpasaka sang kaso ang pamilya sang mga biktima bangud sa ila pagpahayag nga nabudlayan sila nga magkuha sang papeles sa Mandurriao PNP.
