Nagpaathag ang mga abogado nga makapiyansa ang isa ka suspek kag makaguwa sa presohan antes pa man pasakaan sang kaso.
Ini ang may kaangtanan sa mag-asawa nga school principal kag manunudlo nga nabungguan patay sa Diversion Road Mandurriao, Iloilo City sang Mazda MX5 sports car.
Ang mga biktima amo sanday Alnie Dinah Osano kag Joe Marie Osano.
Sa interview sang Bombo Radyo kay Atty. Manny Brotarlo, iya ginpahayag nga kinamatarong sang tawo nga makapiyansa ilabi na kun ang kaso nga mahimo ipasaka kay June Paul Valencia, driver sang Mazda MX5 sports car ang ‘bailable’.
Suno kay Brotarlo, sa tion nga may ‘order of release’ na ang akusado nagikan sa korte, makaguwa na ini gilayon sa presohan tubtob nga mabayadan niya ang nagakaigo nga piyansa.
Dugang pa sang natungdan, ang mga dokumento naman nga kinahanglan sang pamilya sang mga biktima agud nga makapasa sang kaso amo ang sworn statement sang mga testigo sa fiscals office, police report kag iban pa nga dokumento may kaangtanan sa kaso.
Samtang suno naman kay Atty. Henz Sayno, ang penalidad sa kaso nga 2 counts of reckless imprudence resulting to damage of property with mulitiple homicide ang may yara lamang sang anum ka tuig nga pagkapreso kag mahimo pa nga makapiyansa rason nga makaguwa gid sa presuhan ang akusado.
Indi lamang makapiyansa kag makaguwa ang akusado sa presuhan kun ang penalidad sang kaso amo nga life imprisonment ukon reclusion perpetua.
May yara naman sang judge nga naka duty kada Sabado nga adlaw sa Municipal Trial Court (MTC).
Dugang pa ni Sayno, wala sang gahum ang MTC nga hatagan sang hold departure order ang akusado sa baylo ang Regional Trial Court (RTC) lamang ang may yara sang hurisdiksyon.
Nahibaluan ngna si Valencia ang nakabase na sa Canada kag ginapahayag may dual citizenship.
