ILOILO CITY – Nagakahangawa ang mga manugbaligya sa Ortiz wharf nga madulaan sang palangabuhi-an kadungan sang pag-umpisa sang pagkaayo sang pantalan buwas nga adlaw.
Bangud sini, ginsaylo ang mga sakayan-pandagat sa Iloilo Ferry Terminal samtang ginakaayo ang Ortiz Wharf.
Sa interview sang Bombo Radyo kay Liberty Calunsod, presidente sang vendor’s association sa Ortiz wharf, iya ginpahayag nga kadam-an sa ila nga mga manugbaligya ang wala sang may masayluhan nga lugar.
Ginpahayag ni Calunsod nga indi man mahimo nga makasaylo sila sang pwesto sa higad sang dalan ukon sa iban pa nga pantalan sa syudad.
Kun sadto suno kay Calunsod, makalab-ot man sa linibo ang ila ginakita sa sulod sang isa ka adlaw kag daku na nga bulig sa ila pagpangabuhi.
Sa subong suno sa natungdan, mahimo nga madulaan sang palangabuhi-an ang mga vendor bangud nga wala sila sang sayluhan agud nga makabaligya.
