Dismayado si Iloilo City Councilor Joshua Alim sa administrasyon ni outgoing Iloilo City Mayor Jose Espinosa III bangud sa kapaslawan nga ma-implementar ang ordinansa nga nagatalana sang speed limit sa mga salakyan nga nagalabay sa Senator Benigno Aquino Jr. Avenue, Mandurriao, Iloilo City.
Ini kasunod sang natabo nga pagkabunggo sang sports car nga Mazda MX5 sa mag-asawa nga Joe Marie kag Alnie Osano nga nagresulta sa ila kamatayon.
Sa interview sang Bombo Radyo Iloilo kay Councilor Alim nga amo ang principal author sang ordinansa, iya ginpahayag nga apisar ginhold sadto ang nasambit nga ordinansa bangud sa pila ka mga pag-amyendar, apang suno sa iya madugay na nga naaprubahan ini nga amendments.
Suno kay Alim, natingala siya nga wala ma-implementar ang ordinansa nga nagatuyo kuntani nga mabuhinan ang mga disgrasya bangud sa madasig nga pagpadalagan.
Nasaad sa ordinansa nga ang maximum speed para sa mga salakyan sa Senator Benigno Aquino Jr. Avenue ang yara lang sa 60 kilometers per hour (kph) kag 50 kph naman para sa mga bus kag truck.
Samtang ginpahayag sang konsehal nga nagalaum siya nga sa idalom sang administrasyon ni incoming Mayor Jerry Treñas, mapatuman sang strikto ang nasambit nga ordinansa.
