ILOILO CITY – Ginatun-an sang Land Transportation Office (LTO) nga bawion ang lisensya sang driver sang Mazda MX5 sports car nga nakabunggo-patay sa mag-asawa nga school principal kag manunudlo sa Sen. Benigno Aquino Jr. Avenue, Iloilo City.
Sa interview sang Bombo Radyo kay Atty. Allan Sacramento, legal counsel kag pinuno ang Operations Division sang LTO-6, iya ginpahayag nga madamu sang traffic violations ang driver nga si June Paul Valencia.
Santo sa Republic Act 4136 ukon ang Land Transportation and Traffic Code, ginlapas ni Valencia ang traffic rules bangud nga ang mga biktima ang nagatabok sa pedestrian lane sang mabunggu-an sang sports car.
Magluwas diri, ginlapas man ni Valencia ang overspeeding ordinance bangud nga santo sa layi, ang Sen. Benigno Aquino Jr. Avenue ang makabig nga ‘City and Municpal street with light traffic’ sa diin ang maximum speed sang salakyan ang yara lamang sa 30 kms per hour.
May yara sang gahum ang Regional Director sang LTO nga bawion ukon iga-suspend ang lisensya sang isa ka driver, depende sa kabug-aton sang nahimo nga traffic violations.
Sa bahin ni Valencia, ang pinakamabug-at nga silot nga mahimo sang deputized agent ang LTO amo nga ikumpiska ang driver’s license sang driver.
