Nakilala na ang apat ka mga suspek sa likod sang paglupok sang Malaysia Airlines flight MH17 sang Hulyo 2014 kag nagpatay sa 298 ka mga pasahero kag crew.
Lakip sa mga suspek amo ang tatlo ka mga Russians kag isa ka Ukrainian.
Ginkilala sang Joint Investigation Team (JIT) ang mga lalaki nga amo sanday Igor Girkin, anay colonel sang Federal Security Service (FSB) sang Russia; Sergei Dubinsky , empleyado sang GRU military intelligence sa nasambit nga pungsod; Oleg Pulatov, anay militar sang GRU special forces kag deputy head sang intelligence service sang Donetsk, Ukraine; kag ang Ukrainian national nga si Leonid Kharchenko, ang commander sang combat unit sa Eastern Ukraine.
Suno kay Dutch prosecutor Fred Westerbeke, may ebidensiya ang mga imbestigador nga nagapakita nga may yara sang missile launcher ang Russia nga ginbuy-an rason nga naulamid ang eroplano sa paglupok.
Nahibaluan nga nagikan sa Schiphol Airport sa Amsterdam ang eroplano sang Hulyo 17, 2014 kag padulong kuntani sa Kaula Lumpur, Malaysia.
Pila ka oras matapos mag take-off ang eroplano, nadulaan ini sang contact sa air traffic control.
Sang 2015, una na nga ginpahayag sang Dutch Safety Board nga ang eroplano ang gin-igo sang isa ka Buk missile.
Natukiban man sang mga opisyal sang Netherlands, Australia, Belgium, Malaysia kag Ukraine sang Mayo 2018, ang missile system ang ginapanag-iyahan sang 53rd Anti-Aircraft Missile brigade nga nakabase sa Kursk, Russia.
